Las Meligranas

- Mai quiêro meligranas.

- Calha-te agora. Se te purtares biên lhougo te las merco.

Era siêmpre assi todas las bezes que conseguia ir cum mi mai a la feira dal Naso. Sí porque al normal yêra als garotos num iren e quedaran no chafariz dal Rebulhal a espera de algum rebuçadico q'als pais le traissen. Mas por bezes you tenia suôrte e alha iba cum mi mai a la feira.

- Mai, quiêro meligranas. -repetia you bezes sin cunta.

- Merco-te las meligranas se me prometires que nun las comes agora e só las comes an casa.

Prometia bárias bezes, eilha scutia al peso cul feirante e alhá lhebaba you las meligranas. Mirába-las, remirába-las e siêmpre le iba spetando un dedo pula casca de la más madura, escarafunchando por drento para sacar algun granico al mismo tiêmpo que iba correndo para aguantar al passo apressado de mi mai.

- Ai filho, ya mancheste la camisa toda. Num te pedi p'ra comer las meligranas solo an casa? Agora essas manchas num salan... La camisa yêra nuôba e tan branquita. - Iba ralhando eilha anquanto you baixaba la cabeça e guardaba un prudente silêncio.

Oubi mi mai cuntar-me dezenas de bezes que la camisa yêra baranquita e que la mancha num salia... Ainda agora, cinquenta anhos despuis, antre al sabor dal lhume misturado cul cheiro de las tabafeias e de las rabanadas acabadas de fritar, falo de propósito an meligranas para oubir mi mai dezir

- Quando eras pequenho, tenias uã camisa tan branquita e merquei-te meligranas...

Pensando biên, gusto más de la cunta que dals granicos burmeilhos.